ഐസിസി ടി20 ലോകകപ്പിൽ തൻ്റെ മോശം പ്രകടനം തുടർന്ന് പാകിസ്ഥാൻ ക്യാപ്റ്റൻ ബാബർ അസം. സൗത്താഫ്രിക്കയ്ക്കെതിരായ നിർണായക പോരാട്ടത്തിലും തിളങ്ങുവാൻ താരത്തിന് സാധിച്ചില്ല.
15 പന്തിൽ 6 റൺസ് നേടിയാണ് സൗത്താഫ്രിക്കയ്ക്കെതിരായ മത്സരത്തിൽ ബാബർ പുറത്തായത്. ലുങ്കി എൻകീഡിയാണ് താരത്തെ പുറത്താക്കിയത്. ഈ ലോകകപ്പിൽ നാല് ഇന്നിങ്സിൽ നിന്നും വെറും 14 റൺസ് നേടുവാൻ മാത്രമാണ് ബാബർ അസമിന് സാധിച്ചിട്ടുള്ളത്. ഇന്ത്യയ്ക്കെതിരെ ആദ്യ പന്തിൽ പുറത്തായ താരം നെതർലൻഡ്സിനെതിരെയും സിംബാബ്‌വെയ്ക്കെതിരെയും വെറും 4 റൺസ് നേടിയാണ് പുറത്തായത്. 3.50 മാത്രമാണ് താരത്തിൻ്റെ ശരാശരി, സ്ട്രൈക്ക് റേറ്റാകട്ടെ 50 ലും താഴെയാണ്.
ഈ വർഷം നടന്ന ഏഷ്യ കപ്പിലും മോശം പ്രകടനമായിരുന്നു ബാബർ കാഴ്ച്ചവെച്ചത്. 6 ഇന്നിങ്സിൽ നിന്നും വെറും 68 റൺസ് മാത്രമാണ് ഏഷ്യ കപ്പിൽ ബാബർ നേടിയത്.
സൗത്താഫ്രിക്കയ്ക്കെതിരായ ഈ മത്സരത്തിൽ വിജയിച്ചാൽ മാത്രമേ നേരിയ സെമിഫൈനൽ പ്രതീക്ഷകൾ നിലനിർത്താൻ പാകിസ്ഥാന് സാധിക്കൂ. മത്സരത്തിൽ വിജയിച്ചാൽ സൗത്താഫ്രിക്ക സെമിഫൈനൽ ഉറപ്പിക്കുകയും പാകിസ്ഥാൻ സെമികാണാതെ പുറത്താവുകയും ചെയ്യും.