അടുത്ത വർഷം നടക്കാനിരിക്കുന്ന പാകിസ്ഥാൻ പര്യടനത്തിൽ കളിക്കുവാനോ ഇന്ത്യൻ പ്രീമിയർ ലീഗിൽ നിന്നും പിന്മാറാനോ കളിക്കാരെ നിർബന്ധിക്കുകയില്ലെന്ന് ന്യൂസിലൻഡ് ക്രിക്കറ്റ് ബോർഡ്. അടുത്ത വർഷം ഐ പി എൽ നടക്കുന്ന അതേ സമയത്താണ് ന്യൂസിലൻഡിൻ്റെ പാകിസ്ഥാൻ പര്യടനം നടക്കുന്നത്.
രണ്ട് ഘട്ടങ്ങളിലായാണ് ന്യൂസിലൻഡിൻ്റെ പാകിസ്ഥാൻ പര്യടനം നടക്കുന്നത്. ഈ വർഷം ഡിസംബർ രണ്ട് മത്സരങ്ങളുടെ ടെസ്റ്റ് പരമ്പരയ്ക്കായി ന്യൂസിലൻഡ് പാകിസ്ഥാനിലെത്തും പിന്നീട് ജനുവരിയിൽ ഏകദിന സൂപ്പർ ലീഗിലെ മൂന്ന് മത്സരങ്ങൾ ഇരുടീമുകളും തമ്മിൽ കളിക്കും.
ഐ പി എൽ നടക്കുന്ന ഏപ്രിൽ മാസത്തിലാണ് രണ്ടാം പര്യടനം നടക്കുന്നത്. ഈ പര്യടനത്തിൽ അഞ്ച് ടി20 മത്സരങ്ങളിലും മൂന്ന് ഏകദിന മത്സരങ്ങളിലും ഇരുടീമുകളും തമ്മിൽ ഏറ്റുമുട്ടും.
” ഞങ്ങളുടെ ധാരണപ്രകാരം ഞങ്ങളുടെ പ്രധാന ടീം തന്നെ പാകിസ്ഥാനിലേക്ക് തിരിക്കും. പക്ഷേ ഇക്കാര്യത്തിൽ കളിക്കാരുമായോ അവരുടെ അസോസിയേഷനുമായോ ഞാൻ സംസാരിച്ചിട്ടില്ല. എന്നാൽ ഐ പി എല്ലിൽ കളിക്കാൻ അവരെ അനുവദിക്കും. ഐ പി എല്ലും പാകിസ്ഥാൻ പര്യടനവും തിരഞ്ഞെടുക്കാൻ അവർക്ക് സ്വാതന്ത്യമുണ്ട്. ” ന്യൂസിലൻഡ് ക്രിക്കറ്റ് ബോർഡ് സി ഇ ഒ പറഞ്ഞു.
നേരത്തെ കഴിഞ്ഞ വർഷം പര്യടനത്തിനായി ന്യൂസിലൻഡ് ടീം പാകിസ്ഥാനിൽ എത്തിയെങ്കിലും ആദ്യ മത്സരത്തിന് നിമിഷങ്ങൾക്ക് മുൻപ് സുരക്ഷ കാരണങ്ങളെ തുടർന്ന് ന്യൂസിലാൻഡ് പിന്മാറിയിരുന്നു. ആഗോളതലത്തിൽ തന്നെ പാകിസ്ഥാന് വൻ നാണക്കേട് ഈ വിഷയം ഉണ്ടാക്കിയിരുന്നു. പാകിസ്ഥാൻ പ്രധാനമന്ത്രിയായിരുന്നു ഇമ്രാൻ ഖാൻ ഇടപെട്ടിട്ടും ന്യൂസിലൻഡ് പര്യടനത്തിൽ നിന്നും പിന്മാറിയിരുന്നു. അതിനുശേഷം പാകിസ്ഥാൻ ക്രിക്കറ്റ് ബോർഡിന് നഷ്ടപരിഹാരവും ന്യൂസിലൻഡ് നൽകിയിരുന്നു.