ഇന്ത്യൻ പ്രീമിയർ ലീഗ് പന്ത്രണ്ടാം സീസണിന് ദിവസങ്ങൾ മാത്രം ശേഷിക്കെ കേരള ഫാസ്റ്റ് ബൗളർ സന്ദീപ് വാര്യരെ ടീമിലെത്തിച്ച് കൊൽക്കത്ത നൈറ്റ് റൈഡേഴ്‌സ്. ഇക്കഴിഞ്ഞ രഞ്ജി സീസണിൽ തകർപ്പൻ പ്രകടനമായിരുന്നു കേരളത്തിന് വേണ്ടി സന്ദീപ് വാര്യർ കാഴ്ച്ചവെച്ചത് . ചരിത്രത്തിലാദ്യമായി കേരളം സെമിഫൈനലിൽ പ്രവേശിച്ച സീസണും കൂടിയാണ് കഴിഞ്ഞത് . ക്വാർട്ടർ ഫൈനലിൽ ഗുജറാത്തിനെതിരെ നേടിയ എട്ട് വിക്കറ്റ് പ്രകടനമടക്കം 44 വിക്കറ്റുകൾ സീസണിൽ സന്ദീപ് വാര്യർ നേടി . മുഷ്താഖ് അലി ട്രോഫിയിലും മികച്ച പ്രകടനമായിരുന്നു താരം കാഴ്ച്ചവെച്ചത് .
ഇതാദ്യമായല്ല സന്ദീപ് വാര്യർ ഐ പി എൽ കളിക്കുന്നത്. 2013 മുതൽ 2015 വരെ റോയൽ ചലഞ്ചേഴ്‌സ് ബാംഗ്ലൂരിന്റെ താരമായിരുന്നു സന്ദീപ് വാര്യർ .
തങ്ങളുടെ മൂന്നാം കിരീടമെന്ന ലക്ഷ്യത്തോടെയാണ് കൊൽക്കത്ത നൈറ്റ് റൈഡേഴ്‌സ് ഈ സീസണിനായി എത്തുന്നത്. കഴിഞ്ഞ സീസണിൽ ദിനേശ് കാർത്തിക്കിന്റെ കീഴിൽ പ്ലേയോഫിൽ പ്രവേശിക്കാൻ കൊൽക്കത്തയ്ക്ക് സാധിച്ചിരുന്നു .