ഇംഗ്ലണ്ടും അയർലൻഡും തമ്മിലുളള മൂന്നാം ഏകദിനം മഴമൂലം ഉപേക്ഷിച്ചു. ഇംഗ്ലണ്ട് പടുകൂറ്റൻ സ്കോറിലേക്ക് കുതിക്കവെയാണ് ശക്തമായ മഴ വില്ലനായി എത്തിയത്. ഇതോടെ മത്സരം പിന്നീട് ഒരു പന്ത് പോലും എറിയാതെ ഉപേക്ഷിക്കപെടുകയായിരുന്നു.
മത്സരത്തിൽ ആദ്യം ബാറ്റ് ചെയ്ത ഇംഗ്ലണ്ട് 31 ഓവറിൽ 4 വിക്കറ്റ് നഷ്ടത്തിൽ 280 റൺസ് നേടി ബാറ്റ് ചെയ്യവെയാണ് അയർലൻഡിൻ്റെ രക്ഷയ്ക്കായി മഴ എത്തിയത്. 78 പന്തിൽ 12 ഫോറും 2 സിക്സും അടക്കം 107 റൺസ് നേടിയ ബെൻ ഡക്കറ്റ് ഇംഗ്ലണ്ടിനായി പുറത്താകാതെ ക്രീസിലുണ്ടായിരുന്നു.
ഓപ്പണിങ് കൂട്ടുകെട്ടിൽ 7 ഓവറിൽ 87 റൺസ് ഇംഗ്ലണ്ട് നേടിയിരുന്നു. വെറും 22 പന്തിൽ ഫിഫ്റ്റി നേടിയ ഫിലിപ്പ് സാൾട്ടാണ് ഗംഭീര തുടക്കം ടീമിന് നൽകിയത്. 28 പന്തിൽ 7 ഫോറും 4 സിക്സും ഉൾപ്പെടെ 61 റൺസ് നേടിയാണ് സാൾട്ട് പുറത്തായത്. വിൽ ജാക്ക്സ് 21 പന്തിൽ 39 റൺസ് നേടി. എട്ടോവറിനുള്ളിൽ തന്നെ ഇംഗ്ലണ്ട് 100 കടന്നിരുന്നു. ക്യാപ്റ്റൻ സാക് ക്രോലിയാകട്ടെ 42 പന്തിൽ 51 റൺസ് നേടി.
മത്സരം ഉപേക്ഷിക്കപെട്ടതോടെ പരമ്പര 1-0 ന് ഇംഗ്ലണ്ട് സ്വന്തമാക്കി. മത്സരത്തോടെ ഇംഗ്ലണ്ടിൻ്റെ ഹോം സീസണും അവസാച്ചു.