രാജസ്ഥാൻ റോയൽസിനോട് വിടപറഞ്ഞ് ശ്രീലങ്കൻ ഇതിഹാസം ലസിത് മലിംഗ വീണ്ടും മുംബൈ ഇന്ത്യൻസിലേക്ക്. ന്യൂസിലൻഡ് മുൻ പേസർ ഷെയ്ൻ ബോണ്ടിനെ മാറ്റികൊണ്ടാണ് ബൗളിംഗ് പരിശീലകനായി മലിംഗയെ മുംബൈ ഇന്ത്യൻസ് ടീമിൽ തിരിച്ചെത്തിച്ചിരിക്കുന്നത്.
നീണ്ട 9 സീസണുകൾക്ക് ശേഷമാണ് ഷെയ്ൻ ബോണ്ട് മുംബൈ ഇന്ത്യൻസിൻ്റെ പരിശീലക സ്ഥാനം ഒഴിയുന്നത്. മറുഭാഗത്ത് 2021 ൽ വിരമിച്ച ശേഷമാണ് കഴിഞ്ഞ രണ്ട് സീസണുകളിലായി രാജസ്ഥാൻ റോയൽസിൻ്റെ ബൗളിങ് പരിശീലകനായി കുമാർ സംഗക്കാരയ്ക്കൊപ്പം മലിംഗ പ്രവർത്തിച്ചത്.
ഇതിന് മുൻപ് 2018 ൽ മുംബൈയുടെ സപ്പോർട്ട് സ്റ്റാഫിൽ ഒരാളായിരുന്ന മലിംഗ പിന്നീട് ടീമിനായി പ്ലേയറായി തന്നെ തിരിച്ചെത്തിയിരുന്നു. മുംബൈയ്ക്കായി 139 മത്സരങ്ങൾ കളിച്ച മലിംഗ 195 വിക്കറ്റ് ടീമിനായി നേടിയിട്ടുണ്ട്. നാല് തവണ മുംബൈ ഇന്ത്യൻസിനൊപ്പം ഐ പി എൽ കിരീടം നേടുവാനും മലിംഗയ്ക്ക് സാധിച്ചു.
2015 ൽ മുംബൈ ഇന്ത്യൻസിൽ ചേർന്ന ബോണ്ട് നിലവിൽ Mi ഫ്രാഞ്ചൈസികളുടെ ഗ്ലോബൽ പെർഫോമൻസിൻ്റെ തലവൻ കൂടിയാണ്. സൗത്താഫ്രിക്കൻ ലീഗിലും യു എ ഇ ലീഗിലും അമേരിക്കൻ ലീഗിലും നിലവിൽ മുംബൈ ഇന്ത്യൻസിന് ടീമുകളുണ്ട്.