പാകിസ്ഥാനിൽ നടക്കുന്ന ഏഷ്യ കപ്പിൽ ഇന്ത്യ കളിക്കില്ലെന്നും പകരം നൂട്രൽ വേദി ആവശ്യപെടുമെന്നുള്ള ബിസിസിഐ സെക്രട്ടറി ജയ് ഷായുടെ പ്രസ്താവനയോട് ഔദ്യോഗികമായി പ്രതികരിച്ച് പാകിസ്ഥാൻ ക്രിക്കറ്റ് ബോർഡ്. ജയ് ഷായുടെ പ്രസ്താവനയിൽ ഞെട്ടലും നിരാശമുണ്ടെന്ന് പ്രതികരിച്ച പാകിസ്ഥാൻ ക്രിക്കറ്റ് ബോർഡ് ഈ പ്രസ്താവന കൂടുതൽ പ്രത്യാഘാതങ്ങൾ ഉണ്ടാക്കുമെന്ന മുന്നറിയിപ്പും നൽകി.
” അടുത്ത വർഷത്തെ ഏഷ്യ കപ്പ് നൂട്രൽ വേദിയിലേക്ക് മാറ്റുന്നതുമായി ബന്ധപ്പെട്ട് എ സി സി പ്രസിഡൻ്റ് ജയ് ഷാ ഇന്നലെ നടത്തിയ പരാമർശത്തിൽ പി സി ബി ആശ്ചര്യവും നിരാശയും രേഖപ്പെടുത്തുന്നു. ഏഷ്യൻ ക്രിക്കറ്റ് കൗൺസിൽ ബോർഡുമായോ പാകിസ്ഥാൻ ക്രിക്കറ്റ് ബോർഡുമായോ യാതൊരു ചർച്ചയും നടത്താതെ ദീർഘകാല പ്രത്യാഘാതങ്ങളെ കുറിച്ച് ചിന്തിക്കാതെയാണ് ഇത്തരമൊരു പരാമർശം ഉണ്ടായിരിക്കുന്നത്. ”
” പാകിസ്ഥാന് ഏഷ്യ കപ്പ് അനുവദിച്ച എ സി സി മീറ്റിങിൽ അദ്ധ്യക്ഷത വഹിച്ച ശേഷം ഏഷ്യ കപ്പ് പാകിസ്ഥാനിൽ നിന്നും മാറ്റുമെന്ന ജയ് ഷായുടെ പ്രസ്താവന തികച്ചും ഏകപക്ഷീയമാണ്. 1983 ൽ ഏഷ്യൻ ക്രിക്കറ്റ് കൗൺസിൽ രൂപീകരിച്ച തത്വശാസ്ത്രത്തിനും ആത്മാവിനും വിരുദ്ധമായ പരാമർശമാണിത്. “
” ജയ് ഷായുടെ ഈ പ്രസ്താവന ഏഷ്യ, അന്തർദേശീയ ക്രിക്കറ്റ് കമ്യൂണിറ്റികൾ തമ്മിലുള്ള ബന്ധത്തിൽ വിള്ളലുണ്ടാക്കാൻ സാധ്യതയുണ്ട്. കൂടാതെ അടുത്ത വർഷം നടക്കുന്ന ഐസിസി ഏകദിന ലോകകപ്പിനെയും 2024-31 സർക്കിളിൽ ഇന്ത്യയിൽ നടക്കാനിരിക്കുന്ന ഭാവി ഐസിസി ടൂർണമെൻ്റുകളെയും ഇത് ബാധിക്കും. ” ഔദ്യോഗിക പ്രസ്താവനയിൽ പാകിസ്ഥാൻ ക്രിക്കറ്റ് ബോർഡ് വ്യക്തമാക്കി.