റോയൽ ചലഞ്ചേഴ്സ്‌ ബാംഗ്ലൂരിനെതിരായ തകർപ്പൻ പ്രകടനത്തോടെ ഐ പി എൽ ചരിത്രത്തിൽ മറ്റൊരു ചെന്നൈ സൂപ്പർ കിങ്സ് താരത്തിനും നേടാൻ സാധിക്കാത്ത റെക്കോർഡ് സ്വന്തമാക്കി രവീന്ദ്ര ജഡേജ. ജഡേജയുടെ തകർപ്പൻ ഓൾ റൗണ്ടർ പ്രകടനത്തിന്റെ മികവിലാണ് മത്സരത്തിൽ 69 റൺസിന്റെ വിജയം ചെന്നൈ സൂപ്പർ കിങ്സ് നേടിയത്.
മത്സരത്തിൽ 62 റൺസ് നേടിയ ജഡേജയുടെയും 50 റൺസ് നേടിയ ഫാഫ് ഡുപ്ലെസിസിന്റെയും മികവിൽ ചെന്നൈ സൂപ്പർ കിങ്സ് ഉയർത്തിയ 192 റൺസിന്റെ വിജയലക്ഷ്യം പിന്തുടർന്ന ആർ സി ബിയ്ക്ക് നിശ്ചിത 20 ഓവറിൽ 9 വിക്കറ്റ് നഷ്ട്ടത്തിൽ 122 റൺസ് നേടാനെ സാധിച്ചുള്ളു. മത്സരത്തിലെ വിജയത്തോടെ പോയിന്റ് ടേബിളിൽ ആർ സി ബിയെ പിന്നിലാക്കി ചെന്നൈ സൂപ്പർ കിങ്സ് ഒന്നാം സ്ഥാനത്തെത്തിയിരുന്നു. സീസണിലെ ചെന്നൈയുടെ തുടർച്ചയായ നാലാം വിജയം കൂടിയാണിത്‌.
മത്സരത്തിൽ 28 പന്തിൽ പുറത്താകാതെ 62 റൺസ് നേടിയ രവീന്ദ്ര ജഡേജ നാലോവറിൽ 13 റൺസ് മാത്രം വഴങ്ങി മൂന്ന് വിക്കറ്റുകൾ നേടിയിരുന്നു. ഐ പി എല്ലിൽ ഒരേ മത്സരത്തിൽ ഫിഫ്റ്റിയും മൂന്ന് വിക്കറ്റും നേടുന്ന ആദ്യ ചെന്നൈ സൂപ്പർ കിങ്സ് പ്ലേയറെന്ന റെക്കോർഡ് രവീന്ദ്ര ജഡേജ സ്വന്തമാക്കി. ആർ സി ബിയ്ക്കെതിരെ ഒരു മത്സരത്തിൽ മൂന്ന് വിക്കറ്റും ഫിഫ്റ്റിയും നേടുന്ന മൂന്നാമത്തെ താരമാണ് ജഡേജ. ഇതിനുമുൻപ് 2008 ൽ യുവരാജ് സിങും 2018 ൽ ഹാർദിക് പാണ്ഡ്യയും ആർ സി ബി യ്ക്കെതിരെ ഒരു മത്സരത്തിൽ മൂന്ന് വിക്കറ്റും ഫിഫ്റ്റിയും നേടിയിരുന്നു.
മത്സരത്തിലെ അവസാന ഓവറിൽ ഹർഷാൽ പട്ടേലിനെതിരെ 36 റൺസാണ് ജഡേജ അടിച്ചുകൂട്ടിയത്. ( ഒരു നോ ബോൾ ), ഇതോടെ ഐ പി എല്ലിൽ ഒരോവറിൽ ഏറ്റവും കൂടുതൽ റൺസ് നേടുന്ന ബാറ്റ്‌സ്മാനെന്ന റെക്കോർഡിൽ ക്രിസ് ഗെയ്ലിനൊപ്പം രവീന്ദ്ര ജാഡയെത്തി.
ഹർഷാൽ പട്ടേൽ എറിഞ്ഞ അവസാന ഓവറിൽ 5 സിക്സും ഒരു ഫോറും ജഡേജ നേടിയിരുന്നു. ഇതോടെ ഐ പി എല്ലിൽ ഒരോവറിൽ 5 സിക്സ് നേടുന്ന മൂന്നാമത്തെ ബാറ്റ്‌സ്മാനെന്ന റെക്കോർഡും ജഡേജ സ്വന്തമാക്കി. ഇതിനുമുൻപ് ക്രിസ് ഗെയ്ലും രാജസ്ഥാൻ റോയൽസ് താരം രാഹുൽ തിവാട്ടിയയും ഒരോവറിൽ 5 സിക്സ് നേടിയിട്ടുണ്ട്‌.
