ടി20 ക്രിക്കറ്റിൽ 1000 സിക്സ് നേടുന്ന ആദ്യ ബാറ്റ്സ്മാനെന്ന ചരിത്രനേട്ടം സ്വന്തമാക്കി കിങ്സ് ഇലവൻ പഞ്ചാബിന്റെ വെസ്റ്റിൻഡീസ് ഇതിഹാസം ക്രിസ് ഗെയ്ൽ. അബുദാബിയിൽ രാജസ്ഥാൻ റോയൽസിനെതിരായ മത്സരത്തിലാണ് ഗെയ്ൽ ഈ റെക്കോർഡ് സ്വന്തമാക്കിയത്.
മത്സരത്തിൽ 63 പന്തിൽ 99 റൺസ് നേടി പുറത്തായ ഗെയ്ൽ 6 ഫോറും 8 സിക്സും നേടിയിരുന്നു. തന്റെ 409 ആം മത്സരത്തിലാണ് ഈ നാഴികക്കല്ല് ഗെയ്ൽ പിന്നിട്ടത്.
524 മത്സരങ്ങളിൽ നിന്നും 690 സിക്സ് നേടിയ വെസ്റ്റിൻഡീസ് ബാറ്റ്സ്മാൻ കീറോൺ പൊള്ളാർഡാണ് ടി20 ക്രിക്കറ്റിൽ ഏറ്റവും കൂടുതൽ സിക്സ് നേടിയവരുടെ പട്ടികയിൽ ഗെയ്ലിന് പുറകിലുള്ളത്.
ടി20 ക്രിക്കറ്റിൽ ഏറ്റവും കൂടുതൽ സിക്സ് നേടിയിട്ടുള്ള ബാറ്റ്സ്മാന്മാർ
- ക്രിസ് ഗെയ്ൽ – 1001
- കീറോൺ പൊള്ളാർഡ് – 690
- ബ്രണ്ടൻ മക്കല്ലം – 485
- ഷെയ്ൻ വാട്സൻ – 467
- ആന്ദ്രേ റസ്സൽ – 447
- എ ബി ഡിവില്ലിയേഴ്സ് – 417
- ആരോൺ ഫിഞ്ച് – 384
- രോഹിത് ശർമ്മ – 376
- ഡ്വെയ്ൻ സ്മിത്ത് – 375
- ഡേവിഡ് വാർണർ – 371
ഗെയ്ലിന്റെ തകർപ്പൻ പ്രകടന മികവിലും മത്സരത്തിൽ വിജയം നേടാൻ പഞ്ചാബിന് സാധിച്ചില്ല.
പഞ്ചാബ് ഉയർത്തിയ 186 റൺസിന്റെ വിജയലക്ഷ്യം 17.3 ഓവറിൽ 3 വിക്കറ്റ് മാത്രം നഷ്ട്ടത്തിൽ രാജസ്ഥാൻ മറികടന്നു.
രാജസ്ഥാന് വേണ്ടി ബെൻ സ്റ്റോക്സ് 26 പന്തിൽ 56 റൺസും സഞ്ജു സാംസൺ 25 പന്തിൽ 48 റൺസും നേടി.