ഇന്ത്യയ്ക്ക് വേണ്ടി തൻ്റെ തകർപ്പൻ പ്രകടനം തുടർന്നുകൊണ്ടിരിക്കുകയാണ് യുവതാരം ശുഭ്മാൻ ഗിൽ. കഴിഞ്ഞ മത്സരത്തിൽ ഫിഫ്റ്റി നേടിയ ഗിൽ ഓസ്ട്രേലിയക്കെതിരായ രണ്ടാം ഏകദിനത്തിൽ തകർപ്പൻ സെഞ്ചുറി നേടിയിരിക്കുകയാണ്. ഈ സെഞ്ചുറിയോടെ തകർപ്പൻ റെക്കോർഡ് കോഹ്ലിയും സച്ചിനും അടക്കമുള്ളവരെ ഗിൽ പിന്നിലാക്കി.
മത്സരത്തിൽ 92 പന്തിൽ നിന്നുമാണ് ഗിൽ തൻ്റെ സെഞ്ചുറി പൂർത്തിയാക്കിയത്. രണ്ടാം വിക്കറ്റിൽ ശ്രേയസ് അയ്യരിനൊപ്പം 200 റൺസ് ഗിൽ കൂട്ടിചേർത്തു. 97 പന്തിൽ 6 ഫോറും 4 സിക്സും ഉൾപ്പെടെ 104 റൺസ് നേടിയാണ് ഗിൽ പുറത്തായത്.
ഏകദിന ക്രിക്കറ്റിലെ ഗില്ലിൻ്റെ ആറാം സെഞ്ചുറിയാണിത്. വെറും 35 ഇന്നിങ്സ് കളിച്ചുകൊണ്ടാണ് ആറ് സെഞ്ചുറികൾ താരം നേടിയിരിക്കുന്നത്. ഇതോടെ ഏകദിന ക്രിക്കറ്റിൽ ഏറ്റവും വേഗത്തിൽ 6 സെഞ്ചുറി നേടുന്ന ഇന്ത്യൻ താരമെന്ന തകർപ്പൻ റെക്കോർഡ് ഗിൽ സ്വന്തമാക്കി.
46 ഇന്നിങ്സിൽ നിന്നും 6 സെഞ്ചുറി നേടിയ ശിഖാർ ധവാനെയും 53 ഇന്നിങ്സിൽ നിന്നും 6 സെഞ്ചുറി കുറിച്ച കെ എൽ രാഹുലിനെയുമാണ് ഗിൽ പിന്നിലാക്കിയത്. വിരാട് കോഹ്ലി 61 ഇന്നിങ്സിൽ നിന്നുമാണ് 6 ഏകദിന സെഞ്ചുറി നേടിയിരുന്നത്.
ഈ വർഷത്തെ ഗില്ലിൻ്റെ അഞ്ചാം ഏകദിന സെഞ്ചുറിയും ഈ വർഷം താരം അന്താരാഷ്ട്ര ക്രിക്കറ്റിൽ നേടുന്ന ഏഴാം സെഞ്ചുറിയുമാണിത്. 39 ഇന്നിങ്സ് കളിച്ചുകൊണ്ടാണ് 7 സെഞ്ചുറി ഈ വർഷം ഗിൽ നേടിയിരിക്കുന്നത്. വെറും 22 ഇന്നിങ്സിൽ നിന്നും 5 സെഞ്ചുറി നേടികൊണ്ട് കിങ് കോഹ്ലിയാണ് രണ്ടാം സ്ഥാനത്തുള്ളത്.