റോയൽ ലണ്ടൻ ഏകദിന കപ്പിൽ നേടിയ ഡബിൾ സെഞ്ചുറിയോടെ തകർപ്പൻ റെക്കോർഡ് സ്വന്തമാക്കി ഇന്ത്യൻ യുവതാരം പൃഥ്വി ഷാ. വെറും 129 പന്തിൽ നിന്നുമാണ് ലിസ്റ്റ് എ ക്രിക്കറ്റിലെ തൻ്റെ രണ്ടാം സെഞ്ചുറി പൃഥ്വി ഷാ കുറിച്ചിരിക്കുന്നത്.
ഇതോടെ ലിസ്റ്റ് എ ക്രിക്കറ്റിൽ ഒന്നിലധികം ഡബിൾ സെഞ്ചുറി നേടുന്ന രണ്ടാമത്തെ ഇന്ത്യൻ താരമായി പൃഥ്വി ഷാ മാറി. ഇന്ത്യൻ ക്യാപ്റ്റൻ കൂടിയായ രോഹിത് ശർമ്മ മാത്രമാണ് ഇതിന് മുൻപ് ഈ റെക്കോർഡ് സ്വന്തമാക്കിയിട്ടുള്ളത്. മൂന്ന് ഡബിൾ സെഞ്ചുറി ഏകദിന ക്രിക്കറ്റിൽ ഹിറ്റ്മാൻ നേടിയിട്ടുണ്ട്.
നേരത്തെ 2021 ൽ വിജയ് ഹസാരെ ട്രോഫിയിലാണ് ലിസ്റ്റ് എ ക്രിക്കറ്റിലെ ആദ്യ ഡബിൾ സെഞ്ചുറി പൃഥ്വി ഷാ നേടിയത്. 152 പന്തിൽ പുറത്താകാതെ 227 റൺസ് താരം നേടിയിരുന്നു. ഇക്കുറി 152 പന്തിൽ 29 ഫോറും 11 സിക്സും ഉൾപ്പെടെ 244 റൺസ് നേടിയാണ് താരം പുറത്തായത്. ലിസ്റ്റ് എ ക്രിക്കറ്റിലെ ഏറ്റവും ഉയർന്ന ആറാമത്തെ വ്യക്തിഗത സ്കോറും ഇംഗ്ലണ്ട് ലിസ്റ്റ് എ ക്രിക്കറ്റിലെ ഏറ്റവും ഉയർന്ന രണ്ടാമത്തെ വ്യക്തിഗത സ്കോറും കൂടിയാണിത്.