ഇംഗ്ലണ്ടിനെതിരായ ടെസ്റ്റ് പരമ്പരയിലെ ആദ്യ മത്സരത്തിലെ പരാജയത്തിന് പുറകെ ഇന്ത്യൻ ബൗളർമാർക്കെതിരെ വിമർശനവുമായി മുൻ ഇന്ത്യൻ താരം ആശിഷ് നെഹ്റ. മത്സരത്തിൽ ഇന്ത്യൻ ബൗളർമാർ 27 നോ ബോളുകളെറിഞ്ഞതാണ് നെഹ്റയെ ചൊടിപ്പിച്ചത്. ഈ തെറ്റ് ഒരിക്കലും അംഗീകരിക്കാൻ സാധിക്കില്ലയെന്നും ഇക്കാര്യത്തിൽ ഇന്ത്യ കൂടുതൽ ശ്രദ്ധിക്കേണ്ടതുണ്ടെന്നും നെഹ്റ പറഞ്ഞു.
” ഏതൊരു ഫോർമാറ്റിലായാലും ഇത്രയധികം നോ ബോളുകൾ എറിയുകയെന്നത് ഒരിക്കലും അംഗീകരിക്കാൻ സാധിക്കില്ല. അണ്ടർ 14 ക്രിക്കറ്റിനെ പറ്റിയോ അണ്ടർ 16 ക്രിക്കറ്റിനെ പറ്റിയോ അല്ല നമ്മൾ സംസാരിക്കുന്നത്, ഇത് അന്താരാഷ്ട്ര ക്രിക്കറ്റാണ് ” നെഹ്റ പറഞ്ഞു.
9 ബോളുകളാണ് മത്സരത്തിൽ സ്പിന്നർ ഷഹബാസ് നദീം എറിഞ്ഞത്, ബുംറ 8 ബോളുകൾ എറിഞ്ഞപ്പോൾ അശ്വിനും ഇഷാന്ത് ശർമ്മയും 5 വീതം ബോളുകൾ എറിഞ്ഞു.
” താളം കണ്ടെത്താൻ സാധിക്കാതെ ഒരു ബൗളർ പത്തോ പതിനഞ്ചോ നോ ബോളുകൾ എറിഞ്ഞാൽ അതെനിക്ക് മനസ്സിലാക്കാൻ സാധിക്കും. എന്നാൽ എല്ലാ ബൗളർമാരും നോ ബോളുകൾ എറിയുകയെന്നത് അംഗീകരിക്കാൻ സാധിക്കില്ല, അക്കാര്യത്തിൽ യാതൊരു സംശയവും വേണ്ട ” ആശിഷ് നെഹ്റ കൂട്ടിച്ചേർത്തു.
” ഇക്കാര്യത്തിൽ ഇന്ത്യ മെച്ചപ്പെടാനുണ്ട്. ഈ മത്സരത്തിൽ എന്തുകൊണ്ടോ നോ ബോളിൽ വിക്കറ്റുകൾ വീണില്ല. ടെസ്റ്റ് ക്രിക്കറ്റിൽ വിക്കറ്റുകളെന്നത് വളരെ പ്രധാനപെട്ടതാണ്. ഇനി മൂന്ന് ദിവസത്തെ ഇടവേളയുണ്ട്. ഇക്കാര്യം അവർ ഒരു ദിവസമെങ്കിലും പ്രാക്ടീസ് ചെയ്യണം, ഇത് കളിക്കാരുടെ ഉത്തരവാദിത്വമാണ്, കാരണം ഇവിടെ എല്ലാവരും പരിചയസമ്പന്നരാണ്. ” നെഹ്റ പറഞ്ഞു.
