ഇന്ത്യയ്ക്കെതിരായ ആദ്യ ടെസ്റ്റിലെ തകർപ്പൻ സെഞ്ചുറിയോടെ അപൂർവ്വനേട്ടം സ്വന്തമാക്കി ഇംഗ്ലണ്ട് ക്യാപ്റ്റൻ ജോ റൂട്ട്. ടെസ്റ്റ് കരിയറിലെ തന്റെ ഇരുപതാം ടെസ്റ്റ് സെഞ്ചുറിയാണ് ചെന്നൈയിൽ റൂട്ട് കുറിച്ചത്. ജോ റൂട്ടിന്റെ 100 ആം ടെസ്റ്റ് മത്സരം കൂടിയാണിത്.
ഇതിനുമുൻപ് 8 ബാറ്റ്‌സ്മാന്മാർ മാത്രമാണ് തങ്ങളുടെ 100 ആം ടെസ്റ്റ് മത്സരത്തിൽ സെഞ്ചുറി നേടിയിട്ടുള്ളത്. ചെന്നൈയിൽ നേടിയ തകർപ്പൻ സെഞ്ചുറിയോടെ ഈ അപൂർവ്വനേട്ടം സ്വന്തമാക്കുന്ന ഒമ്പതാമത്തെ ബാറ്റ്‌സ്മാനെന്ന റെക്കോർഡ് ജോ റൂട്ട് സ്വന്തമാക്കി.
1968 ൽ ഇംഗ്ലണ്ട് ബാറ്റ്‌സ്മാൻ കോളിൻ കോഡ്രേയാണ് ആദ്യമായി 100 ആം ടെസ്റ്റ് മത്സരത്തിൽ സെഞ്ചുറി നേടിയ ആദ്യ ബാറ്റ്‌സ്മാൻ. പിന്നീട്‌ ഇതിഹാസ താരങ്ങളായ റിക്കി പോണ്ടിങ്, ഗ്രെയിം സ്മിത്ത്, ഇൻസമാം ഉൾ ഹഖ്, ഹാഷിം അംല, ജാവേദ് മിയാൻദാദ് അടക്കമുള്ള ഈ റെക്കോർഡ് സ്വന്തമാക്കിയിരുന്നു.
റിക്കി പോണ്ടിങ് മാത്രമാണ് നൂറാം ടെസ്റ്റിലെ 2 ഇന്നിങ്‌സിലും സെഞ്ചുറി നേടിയിട്ടുള്ള ബാറ്റ്‌സ്മാൻ. ഈ റെക്കോർഡിനൊപ്പം റൂട്ടിന് എത്താൻ കഴിയുമെന്ന പ്രതീക്ഷയിലാണ് ആരാധകരും.
2012-13 പര്യടനത്തിൽ ഇന്ത്യയ്ക്കെതിരെയാണ് റൂട്ട് ടെസ്റ്റ് ക്രിക്കറ്റിൽ അരങ്ങേറ്റം കുറിച്ചത്. 2016 ൽ ഇന്ത്യയ്ക്കെതിരെയാണ് തന്റെ അമ്പതാം ടെസ്റ്റ് മത്സരവും റൂട്ട് കളിച്ചത്.
100 ആം ടെസ്റ്റിൽ സെഞ്ചുറി നേടിയിട്ടുള്ള ബാറ്റ്‌സ്മാന്മാർ
- കോളിൻ കോഡ്രേ
- ജാവേദ് മിയാൻദാദ്
- ഗോർഡൻ ഗ്രീനിഡ്ജ്
- അലക് സ്റ്റുവർട്ട്
- ഇൻസമാം ഉൾ ഹഖ്
- റിക്കി പോണ്ടിങ്
- ഗ്രെയിം സ്മിത്ത്
- ഹാഷിം അംല
- ജോ റൂട്ട്
