ഇന്ത്യയ്ക്കെതിരായ ടി20 പരമ്പരയിലെ മൂന്നാം മത്സരത്തിൽ കൂറ്റൻ സ്കോർ നേടി സൗത്താഫ്രിക്ക. റിലീ റൂസ്സോയുടെ തകർപ്പൻ സെഞ്ചുറി മികവിലാണ് കൂറ്റൻ സ്കോർ സൗത്താഫ്രിക്ക നേടിയത്. പതിവ് പോലെ റൺസ് വഴങ്ങികൂട്ടുന്നതിൽ ഇന്ത്യൻ ബൗളർമാർ യാതൊരു പിശുക്കും കാണിച്ചില്ല.
നിശ്ചിത 20 ഓവറിൽ 3 വിക്കറ്റ് നഷ്ടത്തിൽ 227 റൺസാണ് ആദ്യം ബാറ്റ് ചെയ്ത സൗത്താഫ്രിക്ക അടിച്ചുകൂട്ടിയത്. ടി20 ക്രിക്കറ്റിൽ ഇന്ത്യയ്ക്കെതിരായ ഒരു ടീമിൻ്റെ ഏറ്റവും ഉയർന്ന രണ്ടാമത്തെ ടീം ടോട്ടലാണിത്. കഴിഞ്ഞ മത്സരങ്ങളിൽ 221 റൺസ് നേടിയ തങ്ങളുടെ റെക്കോർഡ് തന്നെയാണ് സൗത്താഫ്രിക്ക മറികടന്നത്. 2016 ൽ 6 വിക്കറ്റ് നഷ്ടത്തിൽ 245 റൺസ് നേടിയ വെസ്റ്റിൻഡീസാണ് ടി20 ക്രിക്കറ്റിൽ ഇന്ത്യയ്ക്കെതിരെ ഏറ്റവും ഉയർന്ന ടീം ടോട്ടൽ നേടിയിട്ടുള്ളത്.
48 പന്തിൽ 7 ഫോറും 8 സിക്സും ഉൾപ്പടെ 100 റൺസ് നേടിയ റിലീ റൂസ്സോയാണ് സൗത്താഫ്രിക്കയ്ക്ക് കൂറ്റൻ സ്കോർ സമ്മാനിച്ചത്. ഡീകോക്ക് 43 പന്തിൽ 6 ഫോറും നാല് സിക്സും ഉൾപ്പടെ 68 റൺസ് നേടി. ബാവുമ 3 റൺസ് മാത്രം നേടി പുറത്തായപ്പോൾ ട്രിസ്റ്റൺ സ്റ്റബ്സ് 23 റൺസും ഡേവിഡ് മില്ലർ 5 പന്തിൽ 19 റൺസും നേടി പുറത്താകാതെ നിന്നു.
16 സിക്സുകളാണ് മത്സരത്തിൽ സൗത്താഫ്രിക്കൻ ബാറ്റ്സ്മാന്മാർ അടിച്ചുകൂട്ടിയത്. ഇന്ത്യൻ ബൗളർമാരിൽ ആർക്കും തന്നെ മികവ് പുലർത്താൻ സാധിച്ചില്ല.