പാകിസ്ഥാനെതിരായ ഏകദിന പരമ്പരയിലെ ആദ്യ മത്സരത്തിലെ തകർപ്പൻ സെഞ്ചുറിയോടെ കോഹ്ലിയുടെ റെക്കോർഡ് തകർത്ത് സൗത്താഫ്രിക്കൻ ബാറ്റ്സ്മാൻ ഹാഷിം അംല .ഏകദിന കരിയറിലെ തന്റെ 27 ആം സെഞ്ചുറിയാണ് ഇന്നലെ പാകിസ്ഥാനെതിരെ അംല നേടിയത് . 167 ഇന്നിങ്‌സിൽ നിന്നും 27 സെഞ്ചുറി നേടിയ അംല ഇതോടെ ഏകദിനക്രിക്കറ്റിൽ ഏറ്റവും വേഗത്തിൽ 27 സെഞ്ചുറി നേടുന്ന ബാറ്റ്സ്മാനായി മാറി . 169 ഇന്നിങ്‌സിൽ നിന്നും 27 സെഞ്ചുറി നേടിയ ഇന്ത്യൻ ക്യാപ്റ്റൻ വിരാട് കോഹ്ലിയെയാണ് അംല മറികടന്നത് . ഏകദിനത്തിൽ 27 സെഞ്ചുറി നേടുന്ന അഞ്ചാമത്തെ ബാറ്റ്സ്മാനാണ് അംല . സച്ചിൻ ടെണ്ടുൽക്കർ, റിക്കി പോണ്ടിങ്, സനത് ജയസൂര്യ, വിരാട് കോഹ്ലി എന്നിവരാണ് അംലയ്ക്ക് മുൻപ് ഈ നേട്ടം സ്വന്തമാക്കിയവർ. 2017 ന് ശേഷം അംല നേടുന്ന ആദ്യ സെഞ്ചുറി കൂടിയാണിത് .ആരെയും ഞെട്ടിപ്പിക്കുന്ന കാര്യമെന്തെന്നാൽ അംല നേടിയ അവസാന രണ്ട് സെഞ്ചുറികൾക്കിടയിൽ വിരാട് കോഹ്ലി ഒമ്പതും രോഹിത് ശർമ എട്ടും സെഞ്ചുറികൾ നേടിക്കഴിഞ്ഞു .
ഏറ്റവും വേഗത്തിൽ ഏകദിനത്തിൽ 27 സെഞ്ചുറി നേടിയവർ
ഹാഷിം അംല – 167 ഇന്നിങ്‌സ്
വിരാട് കോഹ്ലി – 169 ഇന്നിങ്‌സ്
സച്ചിൻ ടെണ്ടുൽക്കർ – 254 ഇന്നിങ്‌സ്
റിക്കി പോണ്ടിങ് – 308 ഇന്നിങ്‌സ്
സനത് ജയസൂര്യ – 404 ഇന്നിങ്‌സ്