സൗത്താഫ്രിക്കയ്ക്കെതിരായ ടി20 പരമ്പരയിലെ ആദ്യ മത്സരത്തിൽ വെസ്റ്റിൻഡീസിന് തകർപ്പൻ വിജയം. മഴമൂലം 11 ഓവറാക്കി ചുരുക്കിയ മത്സരത്തിൽ മൂന്ന് വിക്കറ്റിനായിരുന്നു വിൻഡീസിൻ്റെ വിജയം.
സൗത്താഫ്രിക്ക 11 ഓവറിൽ ഉയർത്തിയ 132 റൺസിൻ്റെ വിജയലക്ഷ്യം 10.3 ഓവറിൽ 7 വിക്കറ്റ് നഷ്ടത്തിൽ വിൻഡീസ് മറികടന്നു.18 പന്തിൽ ഒരു ഫോറും 5 സിക്സും ഉൾപ്പടെ 43 റൺസ് നേടിയ ക്യാപ്റ്റൻ റോവ്മാൻ പോവലിൻ്റെ മികവിലാണ് വെസ്റ്റിൻഡീസ് വിജയം കുറിച്ചത്. ജോൺസൺ ചാൾസ് 14 പന്തിൽ 28 റൺസും ബ്രാൻഡൻ കിങ് 8 പന്തിൽ 23 റൺസും നേടി മികവ് പുലർത്തി.
സൗത്താഫ്രിക്കയ്ക്ക് വേണ്ടി രണ്ടോവറിൽ 21 റൺസ് വഴങ്ങി മൂന്ന് വിക്കറ്റ് നേടിയ മഗാല മാത്രമാണ് തിളങ്ങിയത്.
നേരത്തെ ആദ്യം ബാറ്റ് ചെയ്ത സൗത്താഫ്രിക്ക തുടക്കത്തിലെ തകർച്ചയ്ക്ക് ശേഷം 22 പന്തിൽ 4 ഫോറും 3 സിക്സും ഉൾപ്പടെ 48 റൺസ് നേടിയ ഡേവിഡ് മില്ലറിൻ്റെയും 5 പന്തിൽ 18 റൺസ് നേടിയ മഗാലയുടെയും മികവിലാണ് മികച്ച സ്കോർ നേടിയത്. വിൻഡീസിനായി ഒഡിയൻ സ്മിത്ത്, കോട്രൽ എന്നിവർ രണ്ട് വിക്കറ്റ് വീതം നേടി.
വിജയത്തോടെ മൂന്ന് മത്സരങ്ങളുടെ പരമ്പരയിൽ വിൻഡീസ് 1-0 ന് മുൻപിലെത്തി. ഞായറാഴ്ചയാണ് പരമ്പരയിലെ രണ്ടാം മത്സരം നടക്കുന്നത്.