ഏകദിന ക്രിക്കറ്റിലെ എക്കാലത്തെയും മികച്ച ബാറ്റ്സ്മാൻ ആരാണെന്ന ചോദ്യം എല്ലായ്പ്പോഴും തർക്കങ്ങൾക്ക് വഴിവെയ്ക്കാറുണ്ട്. ഒരു കൂട്ടർ സച്ചിൻ ടെണ്ടുൽക്കറെന്ന് പറയുമ്പോൾ മറ്റൊരു കൂട്ടർ പറയുന്നത് വിരാട് കോഹ്ലിയെന്നാവും. എന്നാൽ ഇക്കാര്യത്തിൽ വ്യത്യസ്ത അഭിപ്രായം പങ്കുവെച്ചചിരിക്കുകയാണ് മുൻ ഇന്ത്യൻ താരവും കമൻ്റേറ്ററുമായ സഞ്ജയ് മഞ്ജരേക്കർ.
സച്ചിൻ ടെണ്ടുൽക്കറോ വിരാട് കോഹ്ലിയോ അല്ല ഏകദിന ക്രിക്കറ്റിലെ എക്കാലത്തെയം മികച്ച ബാറ്റ്സ്മാനെന്ന് അഭിപ്രായപെട്ട മഞ്ജരേക്കർ വിൻഡീസ് ഇതിഹാസം വിവിയൻ റിച്ചാർഡ്സിനെയാണ് എക്കാലത്തെയും മികച്ച ബാറ്റ്സ്മാനായി തിരഞ്ഞെടുത്തത്.
” ആധുനിക യുഗത്തിലേക്ക് നോക്കുകയാണെങ്കിൽ കഴിഞ്ഞ 20 വർഷമായി വിരാട് കോഹ്ലി അവിടെയുണ്ട്. ടെണ്ടുൽക്കർ എക്കാലത്തെയും മികച്ച ബാറ്റ്സ്മാന്മാരിൽ ഒരാളാണ്. വിരാട് കോഹ്ലി എൻ്റെ പുസ്തകത്തിൽ എല്ലാം തികഞ്ഞ ഏകദിന പ്ലേയറാണ്. ധോണിയും എൻ്റെ മനസ്സിൽ വരുന്ന മറ്റൊരു താരമാണ്. ”
” പക്ഷേ എക്കാലത്തെയും മികച്ച ഏകദിന ബാറ്റ്സ്മാനെ നോക്കിയാൽ സർ വിവിയൻ റിച്ചാർഡ്സിൻ്റെ അരികിലെത്താൻ പോലും ആരുമില്ല. ഇപ്പോൾ അദ്ധേഹത്തിൻ്റെ ശൈലി പഴയതായി തോന്നാം. അദേഹത്തിൻ്റെ കാലത്ത് ടോപ്പ് ക്ലാസ് ബാറ്റ്സ്മാന്മാരായ ഗോർഡൻ ഗ്രീനിഡ്ജ് അടക്കമുളളവരുടെ ബാറ്റിങ് ശരാശരി മുപ്പതുകളും സ്ട്രൈക്ക് റേറ്റ് 60 കളിലുമായിരുന്നു. എന്നാൽ അക്കാലത്ത് കളിച്ച വിവിയൻ റിച്ചാർഡ്സ് ലോകകപ്പ് ഫൈനലിൽ സെഞ്ചുറിയടക്കം നേടിയിരുന്നു. അദ്ധേഹത്തിൻ്റെ ബാറ്റിങ് ശരാശരി 47 ഉം സ്ട്രൈക്ക് റേറ്റ് 90 ന് മുകളിലുമായിരുന്നു. ” സഞ്ജയ് മഞ്ജരേക്കർ പറഞ്ഞു.