പുതിയ വർഷത്തിൽ തൻ്റെ ഏറ്റവും വലിയ ലക്ഷ്യം ഇന്ത്യയ്ക്ക് വേണ്ടി ലോകകപ്പ് നേടുകയെന്നതാണെന്ന് ഇന്ത്യൻ ടി20 ക്യാപ്റ്റൻ ഹാർദിക്ക് പാണ്ഡ്യ. ശ്രീലങ്കയ്ക്കെതിരായ ടി20 പരമ്പരയ്ക്ക് മുൻപായി നടന്ന പ്രസ്സ് കോൺഫ്രൻസിലായിരുന്നു പാണ്ഡ്യയുടെ ഈ പ്രതികരണം. പരിക്കിനെ കുറിച്ച് ചിന്തിക്കുന്നില്ലെന്നും ടീമിന് വേണ്ടി തൻ്റെ 100 ശതമാനവും നൽകുമെന്നും പാണ്ഡ്യ പറഞ്ഞു.
” എനിക്കറിയാവുന്ന ഒരേയൊരു ഭാഷ ഹാർഡ് വർക്കാണ്. പരിക്കുകൾ എൻ്റെ കയ്യിലല്ല. പക്ഷേ ഈ പ്രക്രിയയിൽ ഞാൻ വിശ്വസിക്കുന്നുണ്ട്. 2022 വ്യക്തിഗതമായി എനിക്ക് മികച്ച വർഷമായിരുന്നു. പക്ഷേ ഞങ്ങൾക്ക് ലോകകപ്പ് നേടുവാൻ കഴിഞ്ഞില്ല. മൾട്ടി നേഷൻ ടൂർണമെൻ്റുകളിൽ ടീമിനെ വിജയിപ്പിക്കുകയാണ് എൻ്റെ ലക്ഷ്യം. ”
” എൻ്റെ രാജ്യത്തിന് വേണ്ടി ലോകകപ്പ് നേടുകയെന്നതാണ് എൻ്റെ ന്യൂയർ റെസലൂഷൻ. നിർഭാഗ്യവശാൽ കഴിഞ്ഞ വർഷം ഞങ്ങൾക്കതിന് സാധിച്ചില്ല. ഈ വർഷം മെച്ചപ്പെട്ട രീതിയിൽ അത് ചെയ്യുവാൻ ഞാൻ ആഗ്രഹിക്കുന്നു. ” ഹാർദിക്ക് പാണ്ഡ്യ പറഞ്ഞു.
ശ്രീലങ്കയ്ക്കെതിരായ ടി20 പരമ്പരയിൽ ഇന്ത്യയെ നയിക്കുന്നത് ഹാർദിക്ക് പാണ്ഡ്യയാണ്. കൂടാതെ കെ എൽ രാഹുലിനെ മാറ്റി ലിമിറ്റഡ് ഓവർ ക്രിക്കറ്റിൽ ഇന്ത്യൻ ടീമിൻ്റെ സ്ഥിര വൈസ് ക്യാപ്റ്റനായും ഹാർദിക്ക് പാണ്ഡ്യയെ ബിസിസിഐ നിയമിച്ചു.