ഐസിസി ടി20 ലോകകപ്പിലെ രണ്ടാം സെമിഫൈനൽ പോരാട്ടത്തിൽ ഇംഗ്ലണ്ടിനെ നേരിടാൻ ഒരുങ്ങുന്ന ഇന്ത്യൻ ടീമിന് മുന്നറിയിപ്പുമായി മുൻ ഇംഗ്ലണ്ട് ക്യാപ്റ്റൻ മൈക്കൽ വോൺ. ജോസ് ബട്ട്ലറെയും കൂട്ടരെയും ഇന്ത്യ ഭയക്കണമെന്നും ഇന്ത്യയേക്കാൾ മികച്ച ടീമാണ് ഇംഗ്ലണ്ടെന്നും മൈക്കൽ വോൺ പറഞ്ഞു.
” ടി20 ലോകകപ്പ് സെമിഫൈനലിനെ കുറിച്ച് ഇംഗ്ലണ്ട് ആരാധകർ പറയുന്നത് എതിരാളികളായി ഇന്ത്യ വേണ്ടായിരുന്നുവെന്നാണ്. പക്ഷേ യഥാർത്ഥത്തിൽ ഇന്ത്യയാണ് ഇംഗ്ലണ്ടിനെ പേടിക്കേണ്ടത്. ഈ കാലഘട്ടത്തിൽ ഇന്ത്യയേക്കാൾ മികച്ച വൈറ്റ് ബോൾ ടീമാണ് തങ്ങളെന്ന് ഇംഗ്ലണ്ട് തെളിയിച്ചുകഴിഞ്ഞതാണ്. ” മൈക്കൽ വോൺ പറഞ്ഞു.
” അഡ്‌ലെയ്ഡിൽ ഇന്ത്യയ്ക്ക് ലഭിക്കാൻ പോകുന്ന ആരാധക പിന്തുണയായിരിക്കും ഇന്ത്യയെ ഫേവറൈറ്റ്സുകളാക്കുന്നത്. കാണികളിൽ 95 ശതമാനവും ഇന്ത്യൻ ആരാധകരായിരിക്കും, പക്ഷേ അതവരിൽ കൂടുതൽ സമ്മർദം ചെലുത്തും. ഇംഗ്ലണ്ടാകട്ടെ പൊതുവെ ആ അന്തരീക്ഷത്തെ ഇഷ്ടപെടുന്നവരാണ്. ”
” എന്നെ ഭയപ്പെടുത്തുന്ന ഒരു കാര്യം ഇന്ത്യ ആദ്യം ബാറ്റ് ചെയ്ത് വലിയ സ്കോർ നേടുമോയെന്നതാണ്, കാരണം മികച്ച ബൗളിങ് നിര അവർക്കുണ്ട്. ഇംഗ്ലണ്ട് ചേസിങിൽ മികച്ചവരല്ല. ” വോൺ കൂട്ടിച്ചേർത്തു.
ടി20 ലോകകപ്പ് ചരിത്രത്തിൽ മൂന്ന് തവണയാണ് ഇംഗ്ലണ്ടും ഇന്ത്യയും തമ്മിൽ ഏറ്റുമുട്ടിയത്. ഇതിൽ രണ്ട് തവണ ഇന്ത്യ വിജയിച്ചപ്പോൾ ഒരു തവണ മാത്രമാണ് ഇന്ത്യയ്ക്ക് വിജയിക്കാൻ സാധിച്ചത്.