ഐസിസിയുടെ അടുത്ത എഫ് ടി പി കലണ്ടർ മുതൽ ഇന്ത്യൻ പ്രീമിയർ ലീഗിന് രണ്ടര മാസത്തെ ഔദ്യോഗിക വിൻഡോ ഉണ്ടായിരിക്കുമെന്ന ബിസിസിഐ സെക്രട്ടറി ജയ് ഷായുടെ പ്രസ്താവനയ്ക്ക് പുറകെ ആശങ്കയറിയിച്ച് പാകിസ്ഥാൻ ക്രിക്കറ്റ് ബോർഡ്. ഈ തീരുമാനം അന്താരാഷ്ട്ര ക്രിക്കറ്റിനെ സാരമായി ബാധിക്കുമെന്നും ഇതുസംബന്ധിച്ച് മറ്റു ക്രിക്കറ്റ് ബോർഡുകളുമായി ചർച്ച നടത്തുമെന്നും പാകിസ്ഥാൻ ക്രിക്കറ്റ് ബോർഡ് വക്താവ് പറഞ്ഞു.
ഐ പി എൽ മീഡിയ റൈറ്റ്സ് റെക്കോർഡ് വിലയ്ക്ക് വിറ്റുപോയതിന് പുറകെയാണ് അടുത്ത ഐസിസി കലണ്ടർ മുതൽ ഐ പി എല്ലിന് രണ്ടര മാസത്തെ വിൻഡോ ഉണ്ടാകുമെന്ന് ബിസിസിഐ സെക്രട്ടറി ജയ് ഷാ അറിയിച്ചത്. അതുകൊണ്ട് ഇനി മുതൽ ഐ പി എല്ലിൻ്റെ സമയത്ത് അന്താരാഷ്ട്ര ക്രിക്കറ്റിൽ മറ്റു പരമ്പരകൾ ഒന്നും തന്നെയുണ്ടാകില്ല. ഐസിസിയോടും മറ്റു ക്രിക്കറ്റ് ബോർഡുകളോടും ഇക്കാര്യം ചർച്ച ചെയ്തുവെന്നും ജയ് ഷാ വ്യക്തമാക്കിയിരുന്നു. ഇതുമൂലം ഈ രണ്ടര മാസത്തിൽ മറ്റു ടീമുകളുമായി പരമ്പര കളിക്കുവാൻ പാകിസ്ഥാന് സാധിക്കില്ല. മറ്റു ടീമുകളുമായി ഇന്ത്യൻ ടീം ഐ പി എല്ലിന് ശേഷം പരമ്പരകൾ കളിക്കുന്നതിനാൽ ഈ തീരുമാനം തിരിച്ചടിയാകുന്നത് പാകിസ്ഥാൻ ക്രിക്കറ്റ് ബോർഡിനാണ്.
” ജൂലൈയിൽ നടക്കുന്ന കോമവെൽത്ത് ഗെയിംസിനിടെയാണ് ഐസിസി മീറ്റിങ് നടക്കുന്നത് ഈ വിഷയം ഞങ്ങൾ അവിടെ ചർച്ച ചെയ്യും. അന്താരാഷ്ട്ര പരമ്പരകളോട് പ്രതിജ്ഞാബദ്ധമാണെന്ന് ജയ് ഷാ പറഞ്ഞിരുന്നു. പക്ഷേ ഐ പി എല്ലിൻ്റെ ഈ വിപുലീകരണം ക്രിക്കറ്റ് ബോർഡുകൾക്കിടയിൽ ചർച്ച ചെയ്യേണ്ടതുണ്ട്. ” പാക് ക്രിക്കറ്റ് ബോർഡ് വക്താവ് പറഞ്ഞു.
ഈ ഐ പി എൽ സീസണിനിടെയാണ് ഓസ്ട്രേലിയയും പാകിസ്ഥാനും തമ്മിലുള്ള പരമ്പര നടന്നത്. ഈ പരമ്പരയിലൂടെ മികച്ച വരുമാനം നേടിയെടുക്കാൻ പാകിസ്ഥാൻ ക്രിക്കറ്റ് ബോർഡിന് സാധിച്ചിരുന്നു. ഐസിസിയിൽ നിന്നുമാണ് പാക് ക്രിക്കറ്റ് ബോർഡ് പ്രധാന വരുമാനം കണ്ടെത്തുന്നത്. എന്നാൽ ഐസിസിയ്ക്ക് ഏറ്റവും കൂടുതൽ വരുമാനം നേടികൊടുക്കുന്നതാകട്ടെ ബിസിസിഐയുമാണ്. അതുകൊണ്ട് തന്നെ ഈ തീരുമാനത്തിൽ നിന്നും ഐസിസിയെ പിന്തിരിക്കാൻ പാക് ക്രിക്കറ്റ് ബോർഡിന് സാധിക്കുകയില്ലെന്നാണ് നിരീക്ഷകർ വിലയിരുത്തുന്നത്.
