ഐ പി എല്ലിൽ വീണ്ടും സെഞ്ചുറി കുറിച്ച് രാജസ്ഥാൻ റോയൽസിൻ്റെ ഇംഗ്ലീഷ് ബാറ്റ്സ്മാൻ ജോസ് ബട്ട്ലർ. കൊൽക്കത്ത നൈറ്റ് റൈഡേഴ്സിനെതിരായ മത്സരത്തിലാണ് സീസണിലെ തൻ്റെ രണ്ടാം സെഞ്ചുറി ബട്ട്ലർ നേടിയത്. ഈ സെഞ്ചുറിയോടെ തകർപ്പൻ റെക്കോർഡും ബട്ട്ലർ സ്വന്തമാക്കി.
മത്സരത്തിൽ 59 പന്തിൽ നിന്നും സെഞ്ചുറി പൂർത്തിയാക്കിയ ജോസ് ബട്ട്ലർ 61 പന്തിൽ 9 ഫോറും 5 സിക്സുമടക്കം 103 റൺസ് നേടിയാണ് പുറത്തായത്. ജോസ് ബട്ട്ലറുടെ മൂന്നാം ഐ പി എൽ സെഞ്ചുറിയാണിത്.
സെഞ്ചുറിയോടെ രാജസ്ഥാൻ റോയൽസിന് വേണ്ടി ഏറ്റവും കൂടുതൽ സെഞ്ചുറി നേടുന്ന ബാറ്റ്സ്മാനായി ബട്ട്ലർ മാറി. രണ്ട് സെഞ്ചുറി വീതം നേടിയിരുന്ന സഞ്ജു സാംസൺ, അജിങ്ക്യ രഹാനെ, ഷെയ്ൻ വാട്സൺ എന്നിവരെയാണ് ബട്ട്ലർ പിന്നിലാക്കിയത്.
ഒരു സീസണിൽ ഒന്നിലധികം സെഞ്ചുറി നേടുന്ന ആറാമത്തെ ബാറ്റ്സ്മാൻ കൂടിയാണ് ജോസ് ബട്ട്ലർ. 2011 സീസണിൽ 2 സെഞ്ചുറി നേടിയ ക്രിസ് ഗെയ്ൽ, 2016 ൽ 4 സെഞ്ചുറി നേടിയ വിരാട് കോഹ്ലി, 2017 സീസണിൽ രണ്ട് സെഞ്ചുറി നേടിയ ഹാഷിം അംല, 2018 സീസണിൽ 2 സെഞ്ചുറി നേടിയ ഷെയ്ൻ വാട്സൺ, 2020 സീസണിൽ രണ്ട് സെഞ്ചുറി നേടിയ ശിഖാർ ധവാൻ എന്നിവരാണ് ഒരു സീസണിൽ ഒന്നിലധികം സെഞ്ചുറി നേടിയിട്ടുള്ള മറ്റു ബാറ്റ്സ്മാന്മാർ.
സീസണിൽ 6 മത്സരങ്ങളിൽ നിന്നും 2 ഫിഫ്റ്റിയും രണ്ട് സെഞ്ചുറിയും അടക്കം 375 റൺസ് നേടിയിട്ടുണ്ട്.
