സെമിഫൈനലിൽ ഇംഗ്ലണ്ടിനെ പരാജയപെടുത്തി ചരിത്രത്തിലാദ്യമായി ഐസിസി ടി20 ലോകകപ്പ് ഫൈനലിൽ പ്രവേശിച്ചിരിക്കുകയാണ് ന്യൂസിലാൻഡ്. ന്യൂസിലാൻഡ് ഫൈനലിൽ പ്രവേശിച്ചതോടെ തകർപ്പൻ നേട്ടം സ്വന്തമാക്കിയിരിക്കുകയാണ് ക്യാപ്റ്റൻ കെയ്ൻ വില്യംസൺ. ക്രിക്കറ്റ് ചരിത്രത്തിൽ ഇതിനുമുൻപ് 2 ക്യാപ്റ്റന്മാർ മാത്രമാണ് ഈ നേട്ടം സ്വന്തമാക്കിയിട്ടുള്ളത്.
സെമിഫൈനലിൽ 5 വിക്കറ്റിനായിരുന്നു ന്യൂസിലാൻഡിന്റെ വിജയം. മത്സരത്തിൽ ഇംഗ്ലണ്ട് ഉയർത്തിയ 167 റൺസിന്റെ വിജയലക്ഷ്യം 19 ഓവറിൽ 5 വിക്കറ്റ് നഷ്ടത്തിൽ ന്യൂസിലാൻഡ് മറികടന്നു. 47 പന്തിൽ 4 ഫോറും 4 സിക്സുമടക്കം 72 റൺസ് നേടിയ ഡാരൽ മിച്ചൽ, 38 പന്തിൽ 46 റൺസ് നേടിയ ഡെവൺ കോൺവെ, 11 പന്തിൽ 27 റൺസ് നേടിയ ജെയിംസ് നീഷം എന്നിവരുടെ മികവിലാണ് ന്യൂസിലൻഡ് വിജയലക്ഷ്യം മറികടന്നത്.
ഐസിസി ഏകദിന ലോകകപ്പ് ഫൈനലിലെ തോൽവിയ്ക്കുള്ള ന്യൂസിലാൻഡിന്റെ മധുരപ്രതികാരം കൂടിയായിരുന്നുവിത്. 2019 ൽ നടന്ന ലോകകപ്പ് ഫൈനലിൽ സൂപ്പറോറും ടൈ ആയതിനെ തുടർന്ന് ഏറ്റവും കൂടുതൽ ബൗണ്ടറി നേടിയ ഇംഗ്ലണ്ട് ചാമ്പ്യന്മാരാവുകയായിരുന്നു.
ന്യൂസിലാൻഡിന്റെ തുടർച്ചയായ മൂന്നാം ഐസിസി ഫൈനലാണിത്. നേരത്തെ 2019 ൽ നടന്ന ഏകദിന ലോകകപ്പ് ഫൈനലിലും ഈ വർഷം ഐസിസി ടെസ്റ്റ് ചാമ്പ്യൻഷിപ്പ് ഫൈനലിലും ന്യൂസിലാൻഡ് പ്രവേശിച്ചിരുന്നു. ഇതോടെ തുടർച്ചയായി മൂന്ന് ഐസിസി ടൂർണമെന്റുകളിൽ ടീമിനെ ഫൈനലിലെത്തിക്കുന്ന മൂന്നാമത്തെ ക്യാപ്റ്റനെന്ന റെക്കോർഡ് കെയ്ൻ വില്യംസൺ സ്വന്തമാക്കി.
മുൻ വെസ്റ്റിൻഡീസ് നായകൻ ക്ലൈവ് ലോയ്ഡും, മുൻ ഇന്ത്യൻ ക്യാപ്റ്റൻ സൗരവ് ഗാംഗുലിയുമാണ് ഇതിനു മുൻപ് ഈ നേട്ടം സ്വന്തമാക്കിയിട്ടുള്ളത്. 1975 ലും 1979 ലും 1983 ലും നടന്ന ഏകദിന ലോകകപ്പുകളിലാണ് ക്ലൈവ് ലോയ്‌ഡ് വെസ്റ്റിൻഡീസിനെ ഫൈനലിലെത്തിച്ചത്. മറുഭാഗത്ത് 2000 ലും 2002 ലും നടന്ന ചാമ്പ്യൻസ് ട്രോഫിയിലും 2003 ൽ നടന്ന ഏകദിന ലോകകപ്പിലും ഇന്ത്യയെ ഫൈനലിലെത്തിച്ചുകൊണ്ടാണ് സൗരവ് ഗാംഗുലി ഈ റെക്കോർഡ് സ്വന്തമാക്കിയത്.
