ഓവൽ ടെസ്റ്റിൽ ഇംഗ്ലണ്ടിനെതിരായ ഫിഫ്റ്റിയോടെ ഇന്ത്യൻ വിക്കറ്റ് കീപ്പറായി മറ്റൊരു നേട്ടം കൂടെ സ്വന്തം പേരിൽ കുറിച്ച് റിഷഭ് പന്ത്‌. ഇന്ത്യൻ വിക്കറ്റ് കീപ്പർമാരിൽ എം എസ് ധോണി മാത്രമാണ് ഇതിനുമുൻപ് ഈ നേട്ടം സ്വന്തമാക്കിയിട്ടുള്ളത്.
106 പന്തിൽ 50 റൺസ് നേടിയാണ് റിഷഭ് പന്ത്‌ പുറത്തായത്. ടെസ്റ്റ് കരിയറിലെ പന്തിന്റെ ഏഴാം ഫിഫ്റ്റിയാണിത്. മത്സരത്തിലെ പ്രകടനത്തോടെ ഈ വർഷം ടെസ്റ്റ് ക്രിക്കറ്റിൽ 700 റൺസ് റിഷഭ് പന്ത്‌ പൂർത്തിയാക്കി. ഇതോടെ ടെസ്റ്റിൽ ഒരു വർഷത്തിൽ 700 ലധികം റൺസ് നേടുന്ന രണ്ടാമത്തെ ഇന്ത്യൻ വിക്കറ്റ് കീപ്പറെന്ന നേട്ടം പന്ത്‌ സ്വന്തമാക്കി. എം എസ് ധോണിയാണ് ഇതിനുമുൻപ് ഈ നേട്ടം സ്വന്തമാക്കിയിട്ടുള്ളത്.
2010 ൽ 13 മത്സരങ്ങളിൽ നിന്നും 41.61 ശരാശരിയിൽ ഒരു സെഞ്ചുറിയും നാല് ഫിഫ്റ്റിയുമടക്കം 749 റൺസ് എം എസ് ധോണി നേടിയിരുന്നു. റിഷഭ് പന്താകട്ടെ ഈ വർഷം 11 മത്സരങ്ങളിൽ നിന്നും 41.52 ശരാശരിയിൽ ഒരു സെഞ്ചുറിയും 5 ഫിഫ്റ്റിയുമടക്കം 706 റൺസ് നേടിയിട്ടുണ്ട്‌. 1419 റൺസ് നേടിയ ഇംഗ്ലണ്ട് ക്യാപ്റ്റൻ ജോ റൂട്ട്, 906 റൺസ് നേടിയ ഇന്ത്യൻ ഓപ്പണർ രോഹിത് ശർമ്മ എന്നിവർക്ക് ശേഷം ഈ വർഷം ടെസ്റ്റിൽ ഏറ്റവും കൂടുതൽ റൺസ് നേടിയ ബാറ്റ്‌സ്മാനും കൂടിയാണ് റിഷഭ് പന്ത്‌.
ഓവൽ ടെസ്റ്റിൽ സെഞ്ചുറി നേടിയ രോഹിത് ശർമ്മയ്ക്കൊപ്പം ഫിഫ്റ്റി നേടിയ ചേതേശ്വർ പുജാര, ഷാർദുൽ താക്കൂർ, റിഷഭ് പന്ത്‌ എന്നിവരുടെ മികവിലാണ് ഇന്ത്യ രണ്ടാം ഇന്നിങ്സിൽ 466 റൺസ് നേടുകയും ഇംഗ്ലണ്ടിന് മുൻപിൽ 368 റൺസിന്റെ കൂറ്റൻ വിജയലക്ഷ്യം ഉയർത്തുകയും ചെയ്തത്.
