കോവിഡ് പ്രതിരോധത്തിൽ ഇന്ത്യയ്ക്ക് പിന്തുണയുമായി കൊൽക്കത്ത നൈറ്റ് റൈഡേഴ്‌സിന്റെ ഓസ്‌ട്രേലിയൻ ഫാസ്റ്റ് ബൗളർ പാറ്റ് കമ്മിൻസ്. സർക്കാർ ആശുപത്രികളിലേക്ക് ഓക്സിജൻ വാങ്ങുന്നതായി പി എം കെയറിലേക്ക് അമ്പതിനായിരം ഡോളറാണ് പാറ്റ് കമ്മിൻസ് സംഭാവനയായി നൽകിയത്. ഐ പി എല്ലിലെ തന്റെ സഹതാരങ്ങളോട് കഴിയാവുന്ന തരത്തിൽ സംഭാവന ചെയ്യണമെന്നും കമ്മിൻസ് അഭ്യർഥിച്ചു.
” വർഷങ്ങളായി ഞാൻ വളരെയധികം സ്നേഹിക്കുന്ന രാജ്യമാണ് ഇന്ത്യ, ഇവിടുത്തെ ജനങ്ങൾ ഞാൻ കണ്ടുമുട്ടിയതിൽ ഏറ്റവും ഊഷ്മളരും ദയയുള്ളവരുമാണ്. എന്നാൽ ഈ സമയത്ത് എല്ലാവരും വളരെയധികം കഷ്ട്ടപെടുന്നുണ്ടെന്ന് അറിഞ്ഞതിൽ വളരെയധികം ദുഃഖമുണ്ട്. കോവിഡ് 19 പ്രതിസന്ധി ക്രമാതീതമായി ഉയരുമ്പോൾ ഇവിടെ ഐ പി എൽ തുടരുന്നത് ഉചിതമാണോയെന്നതിനെ ഇവിടെ കുറെ ചർച്ചകൾ നടക്കുന്നുണ്ട്. ലോക്ഡൗണിനിടെ ജനങ്ങൾ ബുദ്ധിമുട്ടുന്ന സമയത്ത് ഓരോ ദിവസവും കുറച്ച് മണിക്കൂർ ഐ പി എൽ അവർക്ക് സന്തോഷവും ആശ്വാസവും നൽകുന്നു. ” പാറ്റ് കമ്മിൻസ് ട്വിറ്ററിൽ കുറിച്ചു.
” ഐ പി എൽ എന്ന ഈ പ്ലാറ്റ്ഫോമിലൂടെ ദശലക്ഷക്കണക്കിന് ആളുകളിലേക്ക് എത്തിച്ചേരാൻ സാധിക്കുന്നുവെന്ന ആനുകൂല്യം ഞങ്ങൾക്കുണ്ട്. അത് നല്ലതായി ഞങ്ങൾ ഉപയോഗിക്കണം. അത് മനസിലാക്കികൊണ്ട് പിഎം കെയറിലേക്ക് 50000 ഡോളർ ഞാൻ സംഭാവന നൽകുകയാണ്. ഇത് പ്രത്യേകിച്ചും ഇന്ത്യയിലെ ആശുപത്രികളിലേക്ക് ഓക്സിജൻ വാങ്ങുന്നതിന് വേണ്ടിയാണ്. ” പാറ്റ് കമ്മിൻസ് പറഞ്ഞു.
” ഐ പി എല്ലിലെ എന്റെ സഹകളിക്കാരെയും ഇന്ത്യയുടെ അഭിനിവേശം അനുഭവിച്ചറിഞ്ഞ ഏതൊരാളെയും സംഭാവന നൽകാൻ ഞാൻ പ്രോത്സാഹിപ്പിക്കുകയാണ്. ” പാറ്റ് കമ്മിൻസ് കൂട്ടിച്ചേർത്തു.
ഇന്ത്യയിൽ കോവിഡ് പ്രതിസന്ധി രൂക്ഷമായതിനെ തുടർന്ന് നിരവധി താരങ്ങൾ ഐ പി എല്ലിൽ നിന്നും പിന്മാറികൊണ്ടിരിക്കുകയാണ്. സൺറൈസേഴ്‌സിനെതിരായ മത്സരത്തിന് ശേഷം ഐ പി എല്ലിൽ താൻ അവധിയെടുക്കുന്നതായി ഡൽഹി ക്യാപിറ്റൽസ്‌ സ്പിന്നർ രവിചന്ദ്രൻ അശ്വിനും അറിയിച്ചിരുന്നു.
