പഞ്ചാബ് കിങ്സിനെ 9 വിക്കറ്റിന് പരാജയപെടുത്തി ഐ പി എൽ പതിനാലാം സീസണിലെ ആദ്യ വിജയം നേടി സൺറൈസേഴ്സ് ഹൈദരാബാദ്. മത്സരത്തിൽ പഞ്ചാബ് കിങ്‌സ് ഉയർത്തിയ 121 റൺസിന്റെ വിജയലക്ഷ്യം 18.4 ഓവറിൽ ഒരു വിക്കറ്റ് നഷ്ട്ടത്തിലാണ് സൺറൈസേഴ്സ് ഹൈദരാബാദ് മറികടന്നത്.
56 പന്തിൽ 3 ഫോറും 3 സിക്സുമടക്കം 63 റൺസ് നേടിയ ജോണി ബെയർസ്റ്റോയുടെ മികവിലാണ് അനായാസ വിജയം സൺറൈസേഴ്സ് ഹൈദരാബാദ് നേടിയത്. ക്യാപ്റ്റൻ ഡേവിഡ് വാർണർ 37 പന്തിൽ 37 റൺസ് നേടി പുറത്തായപ്പോൾ കെയ്ൻ വില്യംസൺ 16 റൺസ് നേടി പുറത്താകാതെ നിന്നു.
നേരത്തെ ആദ്യം ബാറ്റ് ചെയ്ത പഞ്ചാബ് കിങ്സിനെ നാലോവറിൽ 21 റൺസ് വഴങ്ങി 3 വിക്കറ്റ് വീഴ്ത്തിയ ഖലീൽ അഹമ്മദ്, നാലോവറിൽ 24 റൺസ് വഴങ്ങി 2 വിക്കറ്റ് വീഴ്ത്തിയ അഭിഷേക് ശർമ്മ എന്നിവരാണ് കുറഞ്ഞ സ്കോറിൽ ചുരുക്കികെട്ടിയത്. ഭുവനേശ്വർ കുമാർ, റാഷിദ് ഖാൻ, സിദ്ധാർഥ് കൗൾ എന്നിവർ ഓരോ വിക്കറ്റ് വീതം നേടി മികച്ച പ്രകടനം പുറത്തെടുത്തു.
പഞ്ചാബ് കിങ്സിന് വേണ്ടി ആർക്കും തന്നെ മികച്ച പ്രകടനം പുറത്തെടുക്കാൻ സാധിച്ചില്ല. 22 റൺസ് നേടിയ മായങ്ക് അഗർവാളും ഷാരൂഖ് ഖാനുമാണ് പഞ്ചാബിന്റെ ടോപ്പ് സ്‌കോറർമാർ.
സീസണിലെ പഞ്ചാബ് കിങ്സിന്റെ തുടർച്ചയായ മൂന്നാം പരാജയമാണിത്. ഇതോടെ പോയിന്റ് ടേബിളിൽ പഞ്ചാബ് കിങ്‌സ് അവസാന സ്ഥാനത്തേക്ക് പിന്തളളപെട്ടു.
