ഇംഗ്ലണ്ടിനെതിരായ പിങ്ക് ബോൾ ടെസ്റ്റിലെ തകർപ്പൻ വിജയത്തോടെ മുൻ ഇന്ത്യൻ നായകൻ എം എസ് ധോണിയുടെ റെക്കോർഡ് തകർത്ത് ഇന്ത്യൻ ക്യാപ്റ്റൻ വിരാട് കോഹ്ലി. അഹമ്മദാബാദിൽ നടന്ന മത്സരത്തിൽ 10 വിക്കറ്റിനായിരുന്നു ഇന്ത്യയുടെ വിജയം. വിജയത്തോടെ പരമ്പരയിൽ ഇന്ത്യ 2-1 ന് മുൻപിലെത്തുകയും ചെയ്തു.
ഇന്ത്യൻ മണ്ണിൽ കോഹ്ലിയുടെ കീഴിൽ ഇന്ത്യ നേടുന്ന 22 ആം ടെസ്റ്റ് വിജയമാണിത്. ഇതോടെ ഹോമിൽ ഏറ്റവും കൂടുതൽ ടെസ്റ്റ് വിജയം നേടുന്ന ഇന്ത്യൻ ക്യാപ്റ്റനെന്ന ചരിത്രനേട്ടം കോഹ്ലി സ്വന്തമാക്കി.
നേരത്തെ ചെന്നൈ ടെസ്റ്റിലെ വിജയത്തോടെ ഈ നേട്ടത്തിൽ മുൻ നായകൻ മഹേന്ദ്ര സിങ് ധോണിയ്ക്കൊപ്പം കോഹ്ലി എത്തിയിരുന്നു. 30 മത്സരങ്ങളിൽ നിന്നാണ് ധോണി ഇന്ത്യയിൽ 21 വിജയം നേടിയത്. കോഹ്ലിയാകട്ടെ 29 മത്സരങ്ങൾ കൊണ്ടാണ് ധോണിയുടെ ഈ റെക്കോർഡ് തകർത്തത്.
മത്സരത്തിലെ വിജയത്തോടെ ഹോമിൽ ഏറ്റവും കൂടുതൽ ടെസ്റ്റ് വിജയം നേടുന്ന ക്യാപ്റ്റനെന്ന നേട്ടത്തിൽ മുൻ ഓസ്‌ട്രേലിയൻ ക്യാപ്റ്റൻ സ്റ്റീവ് വോയ്ക്കൊപ്പവും കോഹ്ലിയെത്തി.
ഹോമിൽ ഏറ്റവും കൂടുതൽ ടെസ്റ്റ് മത്സരം വിജയിച്ച ക്യാപ്റ്റന്മാർ
- ഗ്രെയിം സ്മിത്ത് – 30
- റിക്കി പോണ്ടിങ് – 29
- വിരാട് കോഹ്ലി – 22 *
- സ്റ്റീവ് വോ – 22
- എം എസ് ധോണി – 21
ഹോം ടെസ്റ്റുകളിൽ ഏറ്റവും കൂടുതൽ വിജയം നേടിയ ഇന്ത്യൻ ക്യാപ്റ്റന്മാർ
- വിരാട് കോഹ്ലി – 22 *
- എം എസ് ധോണി – 21
- മൊഹമ്മദ് അസറുദീൻ – 13
- സൗരവ് ഗാംഗുലി – 10
- സുനിൽ ഗാവസ്‌കർ – 7
ബാറ്റ്‌സ്മാന്മാർ റൺസ് കണ്ടെത്താൻ ബുദ്ധിമുട്ടിയ മത്സരത്തിൽ 10 വിക്കറ്റിനാണ് ഇന്ത്യ വിജയിച്ചത്. രണ്ട് ഇന്നിങ്സുകളിൽ നിന്നും 11 വിക്കറ്റുകൾ നേടിയ അക്ഷർ പട്ടേലും 7 വിക്കറ്റുകൾ നേടിയ രവിചന്ദ്രൻ അശ്വിനുമാണ് ഇന്ത്യയെ വിജയത്തിലെത്തിച്ചത്.
