ഓസ്ട്രേലിയക്കെതിരായ ഡേ നൈറ്റ് ടെസ്റ്റിലെ രണ്ടാം ഇന്നിങ്സിൽ ഇന്ത്യ 36 റൺസിന് പുറത്ത്. ടെസ്റ്റ് ക്രിക്കറ്റ് ചരിത്രത്തിലെ ഇന്ത്യയുടെ ഏറ്റവും കുറഞ്ഞ സ്കോറാണിത്.
മൂന്നാം ദിനം 9 ന് 1 എന്ന നിലയിൽ ബാറ്റിങ് പുനരാരംഭിച്ച ഇന്ത്യയ്ക്ക് 27 റൺസ് എടുക്കുന്നതിനിടെ 8 വിക്കറ്റുകൾ നഷ്ടമായി. തുടർന്ന് സ്കോർ 36 ൽ നിൽക്കെ പാറ്റ് കമ്മിൻസ് എറിഞ്ഞ പന്ത് മൊഹമ്മദ് ഷാമിയുടെ വലംകയ്യിൽ കൊണ്ട് പരിക്ക് പറ്റുകയും ഷാമി റിട്ടയർഡ് ഔട്ടാവുകയും ചെയ്തതോടെയാണ് ടെസ്റ്റ് ക്രിക്കറ്റിലെ തങ്ങളുടെ ഏറ്റവും കുറഞ്ഞ സ്കോറെന്ന നാണക്കേട് ഇന്ത്യയ്ക്ക് ലഭിച്ചത്.
ഇതാദ്യമായാണ് ടെസ്റ്റിൽ ഇന്ത്യ 40 ൽ താഴെ റൺസിന് പുറത്താകുന്നത്. 1974 ൽ ഇംഗ്ലണ്ടിനെതിരെ നേടിയ 42 റൺസായിരുന്നു ടെസ്റ്റ് ക്രിക്കറ്റിലെ ഇന്ത്യയുടെ ഏറ്റവും കുറഞ്ഞ സ്കോർ.
ടെസ്റ്റിൽ ഇതിനുമുൻപ് എട്ട് ടീമുകൾ 40 റൺസിന് താഴെ പുറത്തായിട്ടുണ്ട്. 1955 ൽ ഇംഗ്ലണ്ടിനെതിരെ 26 റൺസിന് പുറത്തായ ന്യൂസിലാൻഡിന്റെ പേരിലാണ് ടെസ്റ്റ് ക്രിക്കറ്റിലെ ഏറ്റവും കുറഞ്ഞ സ്കോറെന്ന നാണക്കേടിന്റെ പുറത്ത്.
ടെസ്റ്റ് ക്രിക്കറ്റ് ചരിത്രത്തിലെ ഏറ്റവും കുറഞ്ഞ ടീം ടോട്ടൽ
- ന്യൂസിലാൻഡ് – 26 (1955)
- സൗത്താഫ്രിക്ക – 30 (1896)
- സൗത്താഫ്രിക്ക – 30 (1924)
- സൗത്താഫ്രിക്ക – 35 (1899)
- സൗത്താഫ്രിക്ക – 36 (1932)
- ഓസ്ട്രേലിയ – 36 (192)
- ഇന്ത്യ – 36 (2020)
- അയർലൻഡ് – 38 (2019)
- ന്യൂസിലാൻഡ് – 42 (1946)
- ഓസ്ട്രേലിയ – 42 (1888)
ഇന്ത്യൻ ബാറ്റ്സ്മാന്മാരിൽ ആർക്കും തന്നെ രണ്ടക്കം കടക്കാൻ സാധിച്ചില്ല.
ഓസ്ട്രേലിയക്ക് വേണ്ടി ജോഷ് ഹേസൽവുഡ് അഞ്ചോവറിൽ 8 റൺസ് വഴങ്ങി 5 വിക്കറ്റും പാറ്റ് കമ്മിൻസ് നാല് വിക്കറ്റും നേടി.