രണ്ട് വർഷങ്ങൾക്ക് മുൻപ് അഫ്ഘാനിസ്ഥാൻ സ്പിന്നർ റാഷിദ് ഖാനെ ട്രേഡ് ചെയ്യുവാൻ മുംബൈ ഇന്ത്യൻസ് സമീപിച്ചിരുന്നുവെന്ന് മുൻ സൺറൈസേഴ്സ് ഹൈദരാബാദ് കോച്ച് ടോം മൂഡി. Espncricinfo യുടെ ടി20 ടൈം ഔട്ട് ലൈവിലാണ് ഇക്കാര്യം ടോം മൂഡി വെളിപ്പെടുത്തിയത്.
” രണ്ട് വർഷങ്ങൾക്ക് റാഷിദ് ഖാനെ ട്രേഡ് ചെയ്യുവാൻ മുംബൈ ഇന്ത്യൻസ് സമീപിച്ച കാര്യം ഞാൻ ഓർക്കുന്നുണ്ട്. അത്തരത്തിൽ ഖാനെ പോലെയൊരു താരത്തെ ട്രേഡ് ചെയ്യാൻ ഒരു ടീമിനെ സമീപിക്കാനുള്ള പ്രാപ്തിയും ധൈര്യവുമുള്ള ഫ്രാഞ്ചൈസി മുംബൈ ഇന്ത്യൻസ് മാത്രമാണ്. ” ടോം മൂഡി പറഞ്ഞു.
” മറ്റൊരു ടീമിനും ഇത്രയും ആത്മവിശ്വാസത്തോടെ ട്രേഡിനായി മറ്റൊരു ടീമിനെ സമീപിക്കാൻ സാധിക്കില്ല. അവരുടെ ടീമിന്റെ വിജയത്തിന് പുറകിൽ മാനേജ്മെന്റ് തന്നെയാണ്. മുംബൈ ഇന്ത്യൻസിനുള്ളതിനേക്കാൾ പകുതി സപ്പോർട്ട് സ്റ്റാഫ് മാത്രമായിരുന്നു സൺറൈസേഴ്സിനുണ്ടായിരുന്നത്. “അദ്ദേഹം കൂട്ടിച്ചേർത്തു.
ഫൈനലിൽ ഡൽഹി ക്യാപിറ്റൽസിനെ 5 വിക്കറ്റിന് പരാജയപെടുത്തിയാണ് മുംബൈ തങ്ങളുടെ അഞ്ചാം ഐ പി എൽ ട്രോഫി സ്വന്തമാക്കിയത്.
മത്സരത്തിൽ ഡൽഹി ഉയർത്തിയ 157 റൺസിന്റെ വിജയലക്ഷ്യം 18.4 ഓവറിൽ 5 വിക്കറ്റ് നഷ്ട്ടത്തിൽ മുംബൈ മറികടന്നു.
51 പന്തിൽ 68 റൺസ് നേടിയ ക്യാപ്റ്റൻ രോഹിത് ശർമ്മയുടെയും 19 പന്തിൽ 33 റൺസ് നേടിയ ഇഷാൻ കിഷന്റെയും മികവിലാണ് വിജയലക്ഷ്യം മുംബൈ മറികടന്നത്.